Policia ka njoftuar se ditën e sotme ka arrestuar Enea Bekteshi. Blutë bëjnë me dije se Bekteshi dyshohet se ishte shofer në Audi-in e blinduar që goditi makinën e policisë së zv/ drejtorit. Pas arrestimit nga kontrollet në banesë iu gjet një sasi kanabisi.
Enea Bekteshi është një emër i njohur për autoritetet shqiptare, pasi sipas një dokumenti pak ditë më parë, theksohet se më datë 10 gusht 2017, prokuroria e Elbasanit i ka kërkuar policisë se Shtetit përgjimin fotografik, filmik dhe me audio të Sokol Astrit Sanxhaktarit (dhëndri i Qazim Sejdinit), Kelmend Ymer Xhaferrit dhe Enea Njazi Bekteshi, i cili u arrestua sot.
Por vetëm 13 ditë më pas urdhërit të prokurorisë policia u përgjigj se ‘’nga ana e sektorit të forcës së posaçme, nisur nga dinamika e madhe me shërbime në funksion të procedimeve penale në ndjekje dhe numrit të limituar të ndihmës specialistëve si pasojë e ndjekjes së grafikut të pushimeve vjetore, është e pamundur kryerja e veprimeve të vëzhgimit të fshehtë të personave dhe mjediseve në këtë periudhë kohore’’.
Për sulmin ndaj policisë në Elbasan është në kërkim edhe Suel Çela, djali i biznesmenit Petrit Çela. Sulmi ndaj policisë në Elbasan ndodhi në datë 18 shtator, ndërkohë që Rama deklaroi sot se po e ndjek çështjen. Po gjatë ditës së sotme, pas deklaratave të ambasadorit Donald Lu, Rama zhvilloi një takim me ministrin Xhafaj dhe kryetarin e Kuvendit, Ruçi.
