Një 38-vjeçar nga Elbasani është kapur me një sasi tritoli. Policia informon se në pranga u vu shtetasi Xhaferr Deliu, pasi gjatë kontrollit personal të ushtruar në Lagjen “Dyli Haxhire”, në xhep i është gjetur dhe sekuestruar në cilësinë e provës materiale një pako e mbështjellë me natriban, brenda në të cilën ndodhej një sasi prej 33.5 gr lëndë eksplozive e dyshuar me atë të llojit TNT (Tritol).
Tritoli ishte montuar së bashku me një kapsolle detonatore me gjatësi 2.9 cm si dhe një copë fitili zjarrpërcjellës.
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Prodhimi dhe mbajtja pa leje e armëve luftarake dhe e municionit” parashikuar nga neni 278 i Kodit Penal.
