Nga Endri Shabani
Realisht si guxon në mes të Europës, në 2019 të fusësh policët të rrahin studentët në klasat e tyre?!
Ke vite që i rreh protestuesit, djem, vajza, burra, e gra, në rajone policie apo sheshe. Por sot guxove t’i rrahësh brenda universitetit, në klasat e tyre.
A ka mbetur më një vend i shenjtë ku ti nuk mund të guxosh të futesh me policë?
Kjo mund të ndodhë Korenë e Veriut, në Bangladeshin e viteve 70, në regjimin e Gadafit apo të Enver Hoxhës. Por nuk mund të lejojmë të ndodhë në mes të Europës.
Unë refuzoj të pranoj si normale që policia të rrahë studentët nëpër klasat e tyre, vetëm sepse protestojnë kundër ligjit tënd, të cilin vetë ti po e shkel me të dyja këmbët duke futur policinë.
Dhe unë pyes:
A kanë rektorë këto universitete?
A kanë më dekanë këto fakultete?
A kanë më pedagogë këto auditore?
A ka më Avokat Populli në këtë vend?
A ka President ky shtet?
A ka më deputetë që përfaqësojnë popullin?
Dhe e fundit: A ka më prindër në këtë shoqëri?
Ku jeni?! Çfarë po bëni ndërkohë që fëmijët rrihen, fyhen dhe poshtërohen nga policë që paguhen me paratë tuaja?!
