Një miqësi në FB e kalkuluar mjaft mirë nga një vajzë nga Manza e Durrësit, ka futur në grackë një 30 vjeçar nga fshati Rrushkull i Durrësit, i cili është dashuruar me vajzën që banonte vetëm 7 kilometra larg tij.
Vajza i ka premtuar atij martesë dhe për 2 vjet rresht ka përfituar prej tij mallra, veshje, bizhuteri etj. me vlerë 6 milion lekë. Një takim i dështuar në Milano të Italisë mes tyre ka bërë që djali ta kuptojë se kishte rënë në kurth dhe i është drejtuar policisë ku ka denoncuar mashtrimin e vajzës.
Ditën e martë në datën 26 shtator 2017,sektori i luftës kundër krimit ekonomik në Drejtorinë e Policisë në Durrës arrestoi 27 vjeçaren Enertila Beqaj banuese në Manëz të Durrësit me arsim të mesëm e pa punë.
Arrestimi i saj u krye pas denoncimit të 30 vjeçarit Barush Ahmetaj banor në fshatin Rrushkull të Durrësit. Ai ka rrëfyer se si Beqaj, kishte mundur ta mashtronte duke i premtuar dashurinë dhe martesën në “FB” e duke përfituar prej tij dhurata me vlerë 6 milion lekë.
Gjithçka lindi në FB ku vajza kishte vendosur në profilin e saj foton e një modeleje të huaj. Ata u bënë miq në vitin 2005 dhe për 2 vjet nuk e panë kurrë njëri-tjetrin por u “dashuruan” dhe vajza i premtoi lidhje të përjetëshme djalit. Por për të arritur deri te martesa dhe njohja drejtpërdrejt ajo duhej të bëhej gati. Për këtë duhej rregulluar dhe mobiluar shtëpia e saj prindërore si dhe duheshin siguruar veshje dhe stolira. Djali ja premtoi të gjitha këto dhe për 2 vjet shpenzoi goxha para duke i dërguar asaj materiale ndërtimi për shtëpinë si dhe rroba, stolira e çanta e të tjera të kësaj natyre.
Pas 2 vitesh djali insistoi që ata duhej të takoheshin patjetër dhe vajza i la takim në Milano të Italisë duke i dhënë edhe një numër telefoni. Ai shkoi gjithë qejf në Itali dhe kur i telefonoi asaj që të shkonte në takimin e ëndërruar prej kohësh,numri që ajo i kishte dhënë as që ekzistonte fare. Atëhere 30 vjeçari nga Rrushkulli e kuptoi se kishte rënë në kurth dhe mori rrugën e kthimit në Rrushkullin e tij dhe një ditë më pas denoncoi policinë e Durrësit veprimet e vajzës.
/Shqiptarja.com/
