Policia e Durrësit bën me dije se plot 113 kg kanabis janë gjetur dhe sekuestruar nga roja bregdetare në afërsi të Kepit të Rodonit dhe Gjirit të Lalzit. Droga ishte paketuar në 22 pako.
“Më datë 15.05.2017, gjatë kontrollit të ushtruar nga Roja Bregdetare, Policia Kufitare dhe Seksioni për Hetimin e Narkotikëve, në afërsi të Kepit të Rodonit dhe në zonën e Gjirit të Lalzit, në det janë konstatuar dhe sekuestruar disa pako, të dyshuara me lëndë narkotike Cannabis Sattiva, ku në përfundim rezultoi se pesha e përgjithshme e lëndës narkotike ishte 113 kg e futur në 22 pako”-informoi policia.
Grupi hetimor në bashkëpunim me Prokurorinë e Krimeve të Rënda vijojnë hetimet për zbulimin e origjinës së lëndës, identifikimin e personave të përfshirë në këtë aktivitet kriminal dhe zbardhjen e plotë të ngjarjes.
