Nëse institucionet publike në Shqipëri shumicën e procedurave publike i kanë të parregullta dhe të dyshimta, Bashkia e Tiranës është kampionia e tyre. Radhën për të na e treguar këtë e ka Ujësjellës Kanalizimet Tiranë, e cila është nën varësinë e Bashkisë së Erion Veliajt. UKT ka bërë një tender së fundmi është sa i dyshimtë aq edhe absurd.
Tenderi është hapur në datën 21 dhjetor 2021 për blerje dhe instalim i programit të menaxhimit të aseteve. Procedura mban numrin e referencës REF-15845-12-20-2021 dhe ka një fond limit prej 2.480.000 milionë lekë të reja, ose rreth 25 milionë lekë të vjetra. Në tender ka marrë pjesë “Shoqata e Ujësjellës Kanalizimeve e Shqipërisë” (SHUKALB), e cila nuk ka pasur asnjë konkurrent tjetër dhe është shpallur fituese. Pra, tenderi është zhvilluar pa garë dhe si i tillë, “Open Data” e ka futur në kategorinë e flamurit të kuq me mbishkrimin e mungesës së konkurrencës.
Siç e kemi thënë, tenderët me procedurë të hapur dhe me një konkurrent janë të prirur të krijojnë dyshime se fituesi është i paracaktuar, pra që UKT ta ketë bërë tenderin duke i paraprirë se kush do jetë dhe fituesi. Por në rastin e këtij tenderi nuk ka nevojë për dyshime pasi është rast i pastër i konflikt të interesit.
Kjo pasi fituesi i tenderit, “Shoqata e Ujësjellës Kanalizimeve e Shqipërisë”, ka në bordin drejtues: drejtorin e Shoqërisë Ujësjellës Kanalizime Korçë, drejtorin e Shoqërisë Ujësjellës Kanalizime Tiranë, drejtorin e Shoqërisë Ujësjellës Kanalizime Durrës, drejtorin e Shoqërisë Ujësjellës Kanalizime Vlorë, drejtorin e Shoqërisë Ujësjellës Kanalizime Shkodër, drejtorin e Shoqërisë Ujësjellës Gramsh, drejtorin e Shoqërisë Ujësjellës Tepelenë, drejtor e Shoqërisë Ujësjellës Kanalizime Lezhë, Presidentin e Chimica D’Agostino s.p.a dhe Kryetaren e Grupit Shqiptar të PRU.
Siç e shohim në këtë shoqatë bën pjesë edhe Drejtoria e Ujësjellës Kanalizimeve Tiranë, pikëshit ajo që ka bërë dhe tenderin. E thënë me fjalë të thjeshta, UKT bën tender dhe ia jep shoqatës ku bën pjesë dhe vet. Ky është një rast tjetër i pastër i konfliktit të interesit dhe një rasat tjetër ku drejtori i Erion Veliajt në UKT, Elton Kacidhja, bën procedura publike në shkelje të rregullave të prokurimit dhe në konflikt të pastër interesi për të futur disa taksa të qytetarëve në xhepin e tij./Marrë nga Gijotina.com/
