Kryebashkiaku i Durrësit Vangjush Dako është thirrur në Prokurorinë e Krimeve të Rënda.
Mësohet se Dako është pyetur në lidhje me “Dosjen 339” e shumëpërfolur në media për shitblerjen e votës.
Bëhet e ditur se Dako ishte thirrur në prokurori edhe ditën e enjte dhe është pyetur nga hetuesit për 5 orë me rradhë.
Publikimi i përgjimeve të kreut të Bashkisë së Durrësit me disa prej eksponentëve kryesorë të krimit të organizuar në Qarkun e Durrësit, shkaktoi një tërmet të vërtetë politik në Shqipëri duke i dhënë një goditje të fortë “besueshmërisë” së zgjedhjeve të vitit 2017.
Mësohet se kryebashkiaku i Durrësit është pyetur nga prokurorët Vladimir Mara dhe Dritan Premçi në cilësinë e personit që ka dijeni, ndërsa hetimet janë mjaft sekrete, e për këtë nuk bëhen të ditura detaje nga dëshmia e tij.
