SPAK vijon hetimet për tenderin abuziv për uniformat e Policisë së Shtetit. Sipas burimeve mësohet se Prokuroria e Posaçme po përpiqet të kthejë të penduar dhe bashkëpunëtorë, zyrtarë të arrestuar për tenderin e 2.8 miliardë lekëve të Uniformave të Policisë.
Sipas burimeve janë bërë disa përpjekje që dy nga zyrtarët të vënë tashmë në akuzë për “Shkelje të barazisë në tendera” në bashkëpunim, të japin detaje në lidhje me drejtuesit e tyre, apo çdo formë ndikimi që mund të ketë ardhur nga lart.
Nuk dihet nëse këto përpjekje kanë dhënë rezultat, ndërkohë që prokuroria ka në hetim çështjen nën dyshimin se ka përgjegjës të tjerë në favorizimin që i është bërë kompanisë fituese.
Megjithatë vetëm në bazë dokumentesh është e vështirë të shkohet në nivel drejtues. Nga ana tjetër, SPAK pati nën hetim në të njëjtin procedim dhe një tender të Ministrisë së Mbrojtjes dhe për këtë rast hetimet u ndan dhe po bëhen verifikime të tjera për rastin.
Si ministri i kohës Sandër Lleshaj, ashtu dhe sekretari i përgjithshëm në Ministrinë e Brendshme, Plarent Ndreca, në reagimet e tyre pas aksionit të SPAK janë shprehur se nuk kanë patur dijeni nga çështja e procedurave sa i takon tenderit të uniformave në polici.
