“Nuk jam homofobe, kam miq të këtij komuniteti por refuzoj prishjen e strukturës familjare”
Kështu është shprehur kandidatja për deputete e Partisë Drejtësi, Integrim dhe Unitet, Mesila Doda në emisionin “ Fol me mua, fol me ata”, në TVSH.
E sulmuar nga komuniteti LGBTI për deklaratat e saj ndaj tyre, Doda sqaroi se nuk ka aspak qëllim të sigmatizojë dhe nuk është homofobe por thjesht refuzon prishjen e strukturës familjare.
Doda tregoi se në rrethin e miqve të saj ka pjesëtarë të këtij komuniteti, por struktura familjare parashikon marrëdhënie burrë-grua ndaj një hap të tillë duhet ta vendosë e gjithë shoqëria me referendum dhe jo një vendim gjykate.
“Unë nuk kam stigmatizuar njeri. Nuk jam homofobe, kam miq të mi të këtij komuniteti. Unë kam thënë që martesa duhet të jetë mes një burri dhe një gruaje sepse struktura familjare është krejt tjetër. .Kjo nuk është një çështje gjykate por duhet kaluar në referendum shoqëror. Mund të ketë forma të ndryshme seksualiteti por duhet të vendosë shoqëria për vete, jo thjesht një gjykatës.”, tha Doda.
