Presidenti nuk e dekreton, kolegët e urojnë, Berisha i kërkon dorëheqje
Sapo ka vënë këmbët në sallën e Kuvendit Arbën Ahmetaj ka marrë urime nga kolegët e tij socialist. Ai tashmë është propozuar nga kryetari i tyre, njëkohësisht kryeministri Edi Rama në postin e ministrit të financave. Megjithatë asgjë nuk është mbyllur, ai është në pritje të dekretit të presidentit Nishani.
Kjo nuk do të thotë asgjë për Sali Berishën. Madje ai ka qenë edhe më i ashpër se cdo herë tjetër me ministrin që deri më tani ka drejtuar dikasterin më të madh të qeverisë aktuale.
Berisha e akuzoi fort duke deklaruar njëkohësisht se Ahmetaj është propozuar të jetë në drejtim të financave vetëm për qëllime korruptive.
Për ish kryeministrin vetëm qenia “kampion i korrupsionit” ka qenë kriteri që e ka cuar Ahmetajn në drejtim të finanacve me të cilat sipas Berishës ai “nuk ka asnjë lidhje”.
“Ahmetaj nuk ka idenë e parimeve kyçe të doktrinës financiare. Nuk mund të lejojmë që kryeministri të vjedhë shqiptarët me skemën e TVSHsë. Shkrimet investigative treguan përfshirjen e vëllait të kryeministrit”, akuzoi Berisha në fjalën e tij në Kuvend.
“Tërhiqu sa më parë nga ajo aferë se po cenon stabilitetin e vendit. Tërhiqu nga kjo aventurë dhe mos u bëj simboli më i urryer në historinë e pluralizmit. Në mandatin e parë si zv ministër vodhe 18 milionë impulse me një vlerë prej 15 milionë euro. Mos u bëj mashë e këtij tjetrit për vjedhje”.
Por ministri Ahmetaj i cili për vetë mënyrën se si Rama e ka ndërtuar funksionimin e qeverisë në ndërlidhjen e ekonomisë me financat, e kishte sot një gur të fortë për tu kundërpërgjigjur. Nënshkrimin e këstit të pestë dhe të gjashtë nga mbështetja financiare e FMN-së. Ministri Ahmetaj duke folur tashmë si ministër finance në kundërreplikën e rij u shpreh “Ajo që ndodhi dje në bordin e FMN është konfimrimi i të gjitha reformave që qeveria ka marrë. Dua ti kujtoj të gjithë atyre që kanë vënë në pikëpyetje dy rishikimet e fundit të FMN. Ne vërtetuam edhe njëherë që në një vit fiskal ne nuk abuzuam me financat shqiptare dhe në një vit të vështirë fiskal ne nuk rritëm taksat dhe për më tej kemi garantuar rritje të konsoliduar ekonomike, 2.75%”.
Por Ahmetaj duket e ka kthyer në një sfidë personale betejën në Kuvend me Berishën teksa në përgjigje të akuzave të tij i ka deklaruar ish kryeministrit se “Fakto akuzat e për kokë të 2 gocave dorëhiqem”.
“Nuk ka një çudi se si kalova nga një ministri në tjetrën. Mos mer në mendjen tënde të tilla mendime jo koncesione jo ato që mendon. Ta them miqësisht vër një ekip të shohësh çdo bëj unë në ministrinë e financave. Do bëj të njëjtën gjë siç kam bëre me ekonominë. Dua ndihmën dhe bashkëpunimin e të djathtëve. Do të jap dorëheqjen kam qenë fëmijë që kam negociuar me Rusmailin mbylljen e firmave piramidale që hëngri para dhe jetë shqiptarësh. Asnjëherë nuk kam menduar se buxheti i shtetit janë një rrugë ku mund të fus duart. Të ftoj çdo gjë që mendon se kam hedhur një firma para publike apo një të hapur çoji në prokurori dhe për kokë të dy gocave do jap dorëheqjen në sekondë” – tha Ahmetaj.
Por para se kjo të ndodhë Ahmetajt do ti duhet njëherë të emërohet, apo të presë procedurat sic e cilësoi këtë vonesë Kryetari i Kuvendit, Ilir Meta. Mbetet për tu parë se sa ditë do vonohet dekretimi nga Presidenti i Republikës i cili ka 7 ditë për ta mbyllur procedurën.
