Nga Armand Plaka
Foto e rrallë marrë nga arkivat e OKB-së, shfaq ish-ministrin e Punëve të Jashtme të RPSSH, Nesti Nase ( majtas), ndihmësin e tij, zv/ministrin e Puneve të Jashtme e me pas ministër i Punëve të Jashtme, Reis Malile (në qendër) dhe (djathtas) Abdi Baletën, ish-kreun e Misionit Shqiptar në OKB gjatë periudhës moniste, duke marrë pjesë në diskutimet e një sesioni të OKB-së, në çelje të sesionit të ri në shtator 1980.
Vetëm pak kohë më pas Nesti Nase do të shkarkohej e do të akuzohej si pjesëtar i grupit të “poliagjentit” Mehmet Shehu, ku i shpëtoi për fije dënimit me vdekje, ndërsa vendin e tij do ta zinte zëvendësi i tij, Reis Malile, i cili do ta mbante këtë post deri më 21 shkurt 1991, për t’ia lënë vendin Muhamet Kapllanit.
Abdi Baleta, pas ardhjes së demokracisë, në vitet 1991-1996 u angazhua si deputet i Partisë Demokratike në Kuvendin e Shqipërisë me të cilën më pas pati edhe divergjenca të forta. Nga viti 1995 merret vetëm me publicistikë, si drejtues i gazetës së përjavëshme nacionaliste “Rimëkëmbja”, që botohet në Tiranë.
