Komisioni ad hoc, i ngritur nga Parlamenti për verifikimin e kandidatëve për institucionet e Vettingut, nuk ka mundur të zhvillojë asnjë mbledhje brenda afatit të parashikuar në ligj, duke bllokuar kështu procesin e nominimit të kandidatëve, të cilët do të kalojnë në skaner prokurorët dhe gjyqtarët, për ligjshmërinë e pasurive, lidhjet me krimin dhe aftësisë profesionale.
Bojkoti i partisë më të madhe në opozitë, ka çuar në djegien e afatit të parashikuar në ligjin e Vettingut, brenda të cilit, komisioni ad hoc, duhet të verifikonte kandidatët që kaluan filtrin e parë të Avokatit të Popullit dhe Operacionit Ndërkombëtar të Monitorimit.
Në datën 11.4.2017, Parlamenti miratoi ngritjen e komisionit me anëtarë: Ulsi Manja, Vasilika Hysi dhe Luan Rama. Ndonëse pa përfaqësuesit e opozitës, Kuvendi e ngriti komisionin brenda afatit treditor të parashikuar në pikën 1 të nenit 8 të ligjit të Vettingut. Ndërkaq, pika pesë e nenit tetë të ligjit të Vettingut parashikon që brenda dhjetë ditëve nga krijimi i tij, komisioni ad hoc i përcjell listën e hartuar me kandidatët, dy komisioneve ad hoc përzgjedhëse.
Afati ka përfunduar në datën 21 prill. Deri më sot, komisioni nuk ka mundur të zhvillojë asnjë seancë për shkak të mungesës së anëtarëve të partive opozitare.
Dy skenarët
Dy janë skenarët e mundshëm për ngritjen e institucioneve të Vettingut. Sipas variantit të parë, organet e reja të Vettingut mund të konstituohen pas një pakti të mundshëm mes maxhorancës dhe opozitës. Fati i krizës politike tashmë është i lidhur pazgjidhshmërisht me fatin e Vettingut.
Ndërkaq, në mungesë të një kompromisi të mundshëm mes PS dhe PD, kryeministri Edi Rama ka deklaruar se Vettingu do të zbatohet nga Parlamenti i ri që do të dalë nga zgjedhjet e 18 Qershorit. Në kushtet e bojkotit të Partisë Demokratike, zgjedhjet e 18 Qershorit do të prodhonin një opozitë të re, e cila do të ushtronte detyrën që refuzon ta ushtrojë opozita aktuale.
