Suida Kuka, drejtore e operatorit të kujdesit shëndetësor dyshohet se ishte shënjestra e një atentati me tritol që dështoi ditën e sotme në Shkodër. Bëhet fjalë për pakon e dyshimtë që u gjend në rrugën “Vojo Kushi”, e pashpërthyer. Burime pranë gijotina.com bëjnë me dije se sasia e tritolit e mbështjellë në pako është shpërthyer në mënyrë të kontrolluar nga specialistët e Xhenios dhe RENEA.
Pakoja që alarmoi Shkodrën dhe uniformat blu, sipas burimeve mësohet se ishte vendosur poshtë automjetit të drejtores Suida Kuka.
Fatmirësisht Kuka nuk ra pre e atentatit, pasi pakoja e tritolit u shpërthye nga forcat speciale. Nuk dihen ende autorët, ndërsa pritet të merret në pyetje vetë shënjestra e këtij atentati paralajmërues që dështoi dhe nuk shkaktoi asnjë të plagosur, apo dëme materiale.
Po ashtu pritet që të sekuestrohen kamerat përreth në vendin ku është vendosur pakoja me tritol për të zbardhur gjurmët e autorit apo autorëve. Nuk dihet ende nëse sasia e tritolit është vënë re nga dëshmitarë okularë.
Grupi hetimor po heton në vendin e ngjarjes.
