Dekriminalizimi, s’ka ligj që “i bën fajde” vullnetit të keq
Ministri i Drejtësisë Ylli Manjani është shprehur qartë kundër martesave gay. Fjala është për kundërshtimin e përfshirjes në Kushtetutë të një neni që u hap udhën këtyre martesave, si pjesë e ndryshimeve, të cilat bëhen në kuadër të reformës në drejtësi. Kjo sjell një tjetër pikëpyetje, në një kohë që pritet që reforma në drejtësi të miratohet sa më shpejt.
I ftuar në emisionin “Shih Programin” në RTSH, ministri Manjani foli edhe për ligjin e dekriminalizimit që sipas tij u hartua pas një të keqeje të madhe që kishte kapur politikën.
“Kemi qenë përpara një të keqeje, krimi është ulur këmbëkryq në politikë”, deklaroi Manjani. Ndonëse Ligjin e Dekriminalizimit, ministri Manjani nuk e quan një ligj të përsosur në aspektin juridik, ai i konsideron kërkesat e tij minimaliste.
“Tashmë ligji i ka dhënë efektet e veta. Opinioni e di se kush ka qenë në burg, kush ka më shumë se dy emra e kush ka bërë zullume.”
Sipas tij zgjidhja pas daljes së këtyre të vërtetave do të ishte që këta persona të vetëlargoheshin nga politika. Nëse kjo nuk ndodh Manjani thotë se nuk do të kishte “ligj që i bën fajde vullnetit të keq”. Ndërsa nëse ata rizgjidhen Manjani thotë se kjo “është një cështje krejt tjetër”.
I pyetur për përgjimet Manjani thotë: “Ka një hetim nga Prokuroria dhe ne duhet të presim përfundimin e tij, pavarësisht nëse i besojmë apo jo, na pëlqen apo jo. Mezi po pres një rezultat dhe mendoj se opinion publik meriton të ketë një përgjigje sa më parë.”
