Nga Urim Gjata
Kryetari i Bashkisë së Pustecit, Edmond Themelko që drejton prej shumë vitesh këtë bashki që banohet kryesisht nga qytetarë shqiptarë me kombësi maqedonase gjatë plotësimit të formularit nuk ka deklaruar se është në hetim në Maqedoni nga Prokuroria Speciale që drejtohet nga Katrica Janeva. Edmond Themelko ka shtetësi të dyfishtë, atë të Shqipërisë dhe Maqedonisë dhe njihet si njeri i besueshëm i partisë VMRO-DPMNE.
Nga Prokuroria Speciale e Maqedonisë ai akuzohet për manipulim të disa palë zgjedhjeve, ku ka organizuar me letërnjoftime të dyshimta votuesit maqedonas të Bashkisë së Pustecit në Shqipëri.
Edmond Themelko akuzohet gjithashtu edhe për karta shëndetësore fallco për votuesit e Pustecit.
Këto akuza të ngritura tashmë prej disa muajve nga prokurorja speciale Katica Janeva, në bazë të ligjit të Republikës së Shqipërisë, Edmond Themelko nuk i ka deklaruar në formularin e dekriminalizimit.
Sipas banorëve të Bashkisë së Pustecit Themelko nuk merret me punët e bashkisë, por me propagandë të VMRO-DPMNE dhe sipërmarrjet që ka në Maqedoni.
Disa herë Edmond Themelko është akuzuar nga shtypi opozitar në Maqedoni se bashkëpunon ngushtë me shërbimin e zbulim-kundërzbulim në Maqedoni që kontrollohet prej disa vitesh nga partia në pushtet VMRO-DPMNE.
Nga të gjitha këto akuzat ndaj Edmond Themelkos në Maqedoni nuk ka një reagim nga institucionet shtetërore të Shqipërisë, megjithëse KQZ dhe më pas prokuroria duhet të hetojnë në lidhje me mosdeklarimet në formularin e dekriminalizimit.
