Seanca e sotme në Parlament është shoqëruar me debate të forta pas fjalës së deputetit të PD-së Edmond Spaho. Deputeti demokrat, ka folur në lidhje me çmimet e larta dhe atë se çfarë po bën qeveria për të përballuar krizën. Në fund, Spaho bëri thirrje për protesta, duke akuzuar qeverinë dhe duke përdorur fjalën ‘bastardë’.
“Kjo ka zgjidhje vetëm protestat. Nëse do të vijojmë këtu asgjë nuk do të ndryshojë. Nëse në vendet e tjera do bien çmimet pas gjashtë muajve kjo nuk do të ndodhë. Duhet të ngrihemi në protesta e ti rrëzojmë. Këto marrin vesh vetëm me këtë gjuhë. Nuk ka gjuhë tjetër që shkon me këta bastardë”, deklaroi Spaho.
Kaq ka mjaftuar që kreu i grupit parlamentar të PS-së Taulant Balla që të shpërthente duke i thënë Spahos se duhet të kërkojë falje ose të largohet. Drejtuesja e seancës, nënkryetarja e Kuvendit Ermonela Felaj ndërpreu seancën. Me vendim të Komisionit të Etikës, deputeti demokrat Edmond Spaho është përjashtuar nga seanca plenare ditën e sotme.
