Alket Veliu, anëtar i kryesisë së “Shoqata Çamëria” ka qenë i ftuar në studion e lajmeve të Fax News për të komentuar deklaratat e presidentit grek Pavlopoulos se çamët kanë bashkëpunuar me nazistët.
Sipas Veliut deklarata e presidentit grek bëhet edhe më e rëndë për shkak se është bërë nga toka çame, ku janë kryer një sërë masakrash mbi popullsinë vendase, dhe ky është një kthim në vendin e krimit.
Ai ka dëshmuar me disa foto që kanë qenë krerët e shtetit grek në periudhën e pushtimit nazist ata që kanë bashkëpunuar dhe jo shqiptarët, duke kujtuar këtu gjyshin e ministrit Kotzias.
‘’Në fakt presidenti grek nuk e ka herën e parë që bën deklarata të tilla, po në ndryshim këtë herë deklaratat i ka bërë nga Çamëria, ku janë kryer një sërë masakrash mbi popullsinë shqiptare. Pavlopoulos është kthyer në vendin e krimit, nëse do ti kthehemi historisë në vitin 1913 janë vrarë 72 krerët e zonës, janë thirru nga qeveria greke dhe janë vrarë në mënyrë të befasishme.
Që të shkojmë më tej Pavlopoulos ka shkuar në Paranthi për kujtimin e 49 të vrarëve që janë ekzekutuar nga nazistët, që brenda tyre kanë qenë dhe shumë shqiptar, që në këtë mënyrë rrëzojnë deklaratat e presidentit pasi shqiptarët nuk mund të kenë vrarënjëri tjetrin.
Unë kam sjellë disa foto që rrëzojnë atë që ka thënë presidenti, unë kam sjellë disa foto të gjyshit të Kotzias aktual që janë në foto me përshëndetje naziste, ajo që bie në sy është që edhe vetë prifi ka një përshëndetje të tillë. Kryeministri grek i kohës përshëndeste faktin që Shqipëria asokohe ishte pushtuar nga nazistët.
Pra qeveria greke rehabilitonte familjet që ishin bashkëpuntore me nazistet, gjë që nuk ka ndodhur në asnjë rast në Shqipëri. Mitropoliti i Athinës në vitin 1943 i kërkonte besimtarëve që të mbështesnin nazizmin. Janë nivele të larta të politikës së tyre që kanë bashkëpunuar me nazistët dhe jo shqiptarët e Çamërisë”, u shpreh Veliu.
Veliu u shpreh më tej se qeveria shqiptare po i serviloset Greqisë dhe është rënë dakord nga të dyja anët që çështja çame të mos diskutohet.
‘’Ka qenë gjithnjë politika e Greqisë që çështjen çame jo vetëm që ta lërë mënjanë, po që të mos e përmend fare. Ajo që bie në sy është heshtja e palës shqiptare, që nuk kanë pasur asnjë reagim për këto deklarata. Minimalja që duhej të bëhej për deklaratën e presidentit Pavlopoulos, ishte të kishte një reagim nga shteti shqiptar”. Kjo heshtje është një servilosje e pastër ndaj Greqisë, në një kohë kur janë duke u zhvilluar bisedimet për marrëveshjen mes dy vendeve, u shpreh më tej Veliu.
