Ish ministri i Drejtësisë, Ylli Manjani ka raguar pas deklaratave të kretares së LSI, Monika Kryemadhi, se sipas saj ish ministri ka ndryshuar mendim për djegien e mandateve të Opozitës.
Përmes një postimi të gjatë në Facebook, Manjani sqaron se janë disa ngjarje dhe episode që dëmtuan rëndë opozitarizmin politik në vend.
“Sa i takon historive të shkarkimit tim, ato kanë qenë e mbeten kristal të qarta. Ai që të emëron edhe të shkarkon! Unë nuk isha i preferuari i Edi Ramës ndaj nuk ishte ai që më emëroi. Monika dhe Petrit Vasili kanë qenë dëshimtarët e emërimit, por edhe të shkarkimit tim”, ka sqaruar Manjani në Facebook.
Postimi i plotë
Një sqarim.
———–
U çudita disi mbi deklarimet e zonjës Kryemadhi mbrëmë tek Sokol Balla, se unë paskam ndryshuar mendim për djegien e mandateve të Opozitës!!!
Po të mos ishte një deklarim i përsëritur i saj, nuk do reagoja. Nga ana tjetër e kam shumë bezdi të përsëris veten aq më tepër që për këtë temën e mandateve të opozitës kam qenë dhe mbetem konstant në mendim e për pasojë edhe në të shprehurin publik.
Kam menduar dhe ende mendoj se janë disa ngjarje dhe episode që dëmtuan rëndë opozitarizmin politik në vend.
Së pari ishte marrëveshja PS -PD e 2017, e cila krijoi idenë e një qeverie konsensusi të madh. Sondazhet e kohës të IPR Marketing tregonin në mënyrë ulëritëse që shqiptarët nuk e pranonin atë koalicion. Pra ajo marrëveshje e shkërmoqi opozitarizmin, përveç se dëmtoi rëndë zgjedhjet dhe prishi balancën politike në vend.
Së dyti roli i paqartë i LSI pas zgjedhjeve të 2017 u bë një faktor shtesë që dëmtoi edhe më rëndë idenë opozitariste. LSI qeverisi deri ditën e fundit me PS dhe të nesërmen, deklaroi se ishte në Opozitë. Por ishte në opozitë me Ilir Metën në krye të shtetit dhe pa pa rrjeshtuar bindshëm kundër modelit Rama.
Të flasësh kundër Ramës nuk do të thotë se kundërshton modelin e tij.
Gjithashtu, prania e LSI në opozitë dhe e Metës në shtet u përdor mjeshtërisht nga Rama për të krijuar idenë e përçarjes opozitare. Besoj e mbani mend deklaratën e Ramës kur PD dogji mandatet :” ata skanë konsensus”. Pikërisht ishte fjala për LSI, e cila e vonoi atë vendim.
Dhe qershia mbi tortë e mosbesueshmërisë së LSI ishte deklarata “Erioni ka punuar”, kur opozita ende mendonte të përgatitej për zgjedhje lokale.
Këto dy faktorë ishin kryesorët që dëmtuan rëndë opozitarizmin në vend dhe krijuan idenë që Rama nuk bie.
Ndaj një veprim ekstremisht i fortë që ti tregonte shqiptarëve që opozita është gjallë dhe se e ka seriozisht atë që thotë ishte i domosdoshëm.
Djegia e mandateve ishte VEPRIMI I DUHUR. Pa asnjë dyshim!
Vetëm pas këtij veprimi opozita filloi të besohej dhe njerëzit ju përgjigjën pozitivisht duke tejmbushur sheshet.
Këto janë fakte, jo supozime! As analiza imdividësh, përfshi dhe të miat. Meqë ra fjala kurrë nuk kam kritikuar djegien e mandateve.
Kam reaguar sa herë opozita ka bërë ndonjë hap pas, por jo të kritikoj djegien e mandateve. Psh, unë nuk mendoj se me opozitë jashtë parlamentit do bëhet reformë zgjedhore. Por mendoj se vendi është në krizë politike përfaqësimi dhe se kjo krizë zgjidhet vetëm me zgjedhje. Me këtë kod që është në fuqi.
Desha ta sqaroj këtë gjë sepse kur thuhet në mënyrë të përsëritur gabim, ngulet në kokë në.mënyrë të gabuar.
Sa i takon historive të shkarkimit tim, ato kanë qenë e mbeten kristal të qarta. Ai që të emëron edhe të shkarkon! Unë nuk isha i preferuari i Edi Ramës ndaj nuk ishte ai që më emëroi. Monika dhe Petrit Vasili kanë qenë dëshimtarët e emërimit, por edhe të shkarkimit tim.
Por kjo ska më asnjë rëndësi. Detyrat publike politike siç i merr edhe i lë. Ato nuk janë me konkurs. I kam sqaruar këto gjera dhe skam ndërmend ti rikthehem më.
