Në mbledhjen e jashtëzakonshme të qeverisë mëngjesin e sotëm Edi Rama nuk kërcënoi më gazetarët, por hodhi poshtë të gjitha pikat e propozuara të opozitës. Dhe pasi e rrëzoi këtë plan e ftoi opozitën të ulet në tryezë. Pra, pa propozime, por eja shihemi.
Por, në pikën, ku Edi Rama nuk mban është pika e tretë e opozitës për ndërprerjen e financimeve të oligarkëve nëpërmjet koncesioneve. Ai këtë pikë e quajti si kiameti. Për të qenë sa më empatik përmendi vetëm koncesionet në fushën e shëndetësisë, për të treguar që opozita kërkon t’u heqë shërbimin shëndetësor njerëzve.
Por, Rama bën bllof me renditjen e koncesioneve që bën, sepse ai qëllimisht përmend ato që kanë filluar dhe ajo për të cilët biznesi nuk ka shpenzuar ende asnjë lek. Sipas gazetarit të BIRN, Gjergj Erebara, ka disa mundësi, ku buxheti i koncesioneve, 2.2 miliardë euro, mund të preket për të përballuar kostot e tërmetit.
“Ligji për Buxhetin e Shtetit ka një listë të këtyre projekteve nga të cilat është shumë e lehtë të zgjedhësh se çfarë mund të shtysh për më vonë: Milot – Balldre është një projekt autostrade me kosto të planifikuar 32 miliardë lekë ose 270 milionë euro dhe që synon ndërtimin e një rruge prej vetëm 17 kilometrash të gjatë. Kjo është një nga shumë projektet e infrastrukturës, të cilat që para tërmetit ishin kontroverse dhe të paarsyeshme. Anulimi i kësaj kontrate tashmë që ajo nuk ka nisur ende është një hap shumë i logjikshëm për të siguruar fonde për rindërtimin. Por, Milot – Balldre është larg të qenit e vetmja. Nëse kostot e rindërtimit nga tërmeti janë më shumë se sa kaq, kemi projekte të tjera që mund të anulohen: 1. Rruga Orikum – Dukat, kostoja 83 milionë euro. 2. Incineratori i Tiranës, kostoja e paidentifikuar. 3. Incineratori i Fierit, kostoja e paidentifikuar. 4. Unaza lindore e Tiranës, kostoja 38 milionë euro. Në veçanti, anulimi i dy koncesioneve të rrugëve është veprim i logjikshëm për shkak se këto projekte nuk kanë nisur të zbatohen” -, thotë ai.
