Shumë është përfolur në lidhje me largimin e Cristiano Ronaldos nga Juventusi, por yllin portugez do e shohim sërish pjesë të bardhezinjve edhe sezonin e ardhshëm (ka kontratë deri në verën e vitit 2022).
PSG mbetet një opsion konkret, por vetëm nëse klubi francez vendos të shesë Kylian Mbappe. Drejtori sportiv i Juventusit, Federico Cherubini ka folur rreth situatës së 36-vjeçarit portugez.
“Ne aktualisht nuk kemi marrë asnjë sinjal nga CR7 për t’u larguar këtë verë. Njësoj edhe nga ana jonë. Jemi të lumtur që do e kemi Cristianon sërish me ne në përgatitjet për sezonin e ri”.
Ronaldo u shpall golashënuesi më i mirë i Serie A sezonin e fundit me 29 gola. Në tre sezonet e luajtura në Itali, pesë herë fituesi i “Topit të Artë” ka shënuar 81 gola në kampionat.
