Ministrja e Drejtësisë, Etilda Gjonaj bëri publike masat e marra në burgje për situatën ndaj COVID-19.
Gjonaj njoftoi aktin normativ për çuarjen në shtëpi për 3 muaj të 600 të dënuarve, në zbatim të planit të luftës kundër koronavirusit.
Ministrja tha se deri më tani nuk ka asnjë të burgosur të prekur me COVID-19, por se në institucionet janë në gatishmëri për çdo situatë.
Me propozim të Ministrisë së Drejtësisë, qeveria miratoi aktin normativ për të karantinuar në shtëpitë e tyre për 3 muaj të gjithë personat që u kanë mbetur për të vuajtur nga dënimi i dhënë deri në 3 vjet burgim. Gjithashtu edhe ata që u ka mbetur deri në 5 vjet burgim por që duhet të jenë mbi 60 vjeç dhe që vuajnë nga sëmundje kronike të vërtetuar me dokumente shëndetësore përkatëse.
Rreth 600 është numri total i të dënuarve që pritet të lënë qelitë si përfitues nga ky akt normativ, që merr fuqi prej ditës së sotme.
