Partia Demokratike ka reaguar sot në lidhje me rrijten e çmimit të naftës. Përmes një postimi në Facebook, PD publikon një grafik ku tregon se kosto reale e naftës është shumë herë më e ulët nga se po shitet në tregun tonë. Sipas PD, nafta kushton vetëm 61 lekë dhe e gjithë pjesa tjetër është skemë e qeverisë për të vjedhur popullin.
“Veç 61 lekë është kosto reale me të cilën vjen nga tregjet ndërkombëtare e një litri naftë përpara se taksat ta shndërrojnë në 199 lekë/liter”, thuhet në postimin e publikuar sërish nga numri 2 i PD, Jorida Tabaku. Kujtojmë se në këtë javë çmimi i naftës në vendin tonë shkoi në gati 200 lekë për litër, duke u bërë kështu vendi me çmimin më të lartë në rajon dhe jo vetëm. Ndërsa qeveria rri në heshtje, e vetmja përgjigje që dha është se nuk mund të ndërhyjë në treg.
