Nga Alba Haruni
Çështja Çame nuk është as trofe e as disfatë partish. Nuk munden, të paktën moralisht, të rendin, ta rrëmbejnë si shami stafete.
Nuk munden, megjithëse kanë përkatësi krahinore nga Çamëria.
Nuk munden ata që nuk qenë askund, kur luftohej për Rezolutën e Çamërisë.
Nuk munden, kur të paktën nuk thanë një fjalë, kur ministri i Jashtëm i Greqisë e mohoi kategorikisht ekzistencën e Çështjes Çame.
Nuk munden, sepse të vetmen gjë që dinë të bëjnë, është të hedhin baltë mbi personin që drejton interesat politike të kësaj çështje. Nuk lanë skenar pa thurrur, e fjalë pa shpifur kundër patriotit të tyre dhe pse? Ju them, sepse ju janë prishur interesa foshnjarake. E këta janë nga ata njerëz që “për një plesht djegin jorganin”. Por, Çamëria nuk është jorgani askujt.
Diçka të sinqertë kam për këta njerëz që dua të them se janë vërtetë të zotë në punët e tyre. Me zemër të hapur ju them se nuk degjova kurrë nga zoti Idrizi, të flasë me gjuhën e urrejties ndaj jush. Asnjë fjalë fyese apo denigruese për ju dhe punën tuaj. E vetmja fjalë që kam dëgjuar prej tij është se PDIU e ka derën hapur për cilindo çam e jo çam që e duan Çamërinë, Çështjen Çame dhe Shqipërinë.
Ndërsa nga ju dëgjova të flisni me gjuhën e hasmit dhe për gjëra shumë personale. E kjo nuk është gjuha që ju ka hije çamëve. Ju jeni ata që ftuat elektoratin shqiptar të mos marrë pjesë në votim. Për rrjedhojë nuk duhet të keni moralin të kerkoni asgjë, e jo të tentoni të “merrni stafetën” e Çështjes Çame. Nëse mandati i zotit Idrizi , nuk u gjend i përfaqësuar për tekat e kulisave dhe intrigave të pushteit, për tjetërsim votash apo më keq sepse u sponsorizua nga klanet e shovinizmit grek, kjo nuk do të thotë se nuk u votua. U votua, madje me zemër.
I pashë vetë çamët, jo të interesit, kur bashkë me votën i jepnin dhe bekimin. Pashë nuje shamibardha, kur bashkë me lotin jepnin dhe uratën.
Mos u xhelozoni që patriotin tuaj, Shpëtim Idrizi, sot e duan dhe përkrahin nga jugu në veri 89 mijë shqiptarë, të cilët për shkak të kapriçove të sistemit ndihen të papërfaqësuar. Këta shqiptarë, në një sistem demokratik përfaqësimi do kishin sot tetë mandate të padiskutuara.
Duke mos dashur t’ju përmend emra, sepse tek e fundit jemi të një gjaku ju them: mos u bëni hijena. Një mandat është diçka për Çështjen Çame, por nuk është gjithçka.
Jemi në rrugën e duhur.
