Kryedemokrati Lulzim Basha ka deklaruar se buxheti prej 25 milion eurosh nuk është i mjaftueshëm për situatën që po kalojnë shqiptarët, si pasojë e mbylljes e përhapjes së koronavirusit.
Në një konferencë për mediat, Basha i bën thirrje qeverisë të ulet me biznesin dhe të ndërtojë urgjentisht një paketë masash për ata që nuk kanë dalë dot në punë, e nuk marrin dot rrogat, nuk kanë me çfarë të ushqejnë fëmijët.
“Buxheti 25 mln euro është i pamjaftueshëm, kemi 50% të popullsisë që e mbyll muajin në zero. Biznesi ka reaguar fuqishëm duke kërkuar ndihmë, shoqatat e prodhuesve, fasonët, konvergojnë në shumë pika që ne si opozitë kemi 3 javë që ia kemi propozuar qeverisë. Disa prej sipërmarrjeve që janë në mundësi likuiditeti mund të bashkëpunojnë me qeverinë për fondin e pagave. Qeveria të ulet me biznesin dhe të ndërtojë urgjentisht një paketë masash për ata që nuk kanë dalë dot në punë, e nuk marrin dot rrogat, nuk kanë me cfarë të ushqejnë fëmijët. Tani jemi në urgjencë, thirrja ime ishte të veprohet menjëeherë”,- këshilloi Basha.
