Ministria e Financave: Deficiti është krijuar vetëm në 4 muajt e fundit të vitit
Thuajse të gjitha taksat kryesore, kanë sjellë më pak të ardhura se plani i rishikuar në buxhetin e shtetit. Buxheti i shtetit i vitit 2015 është mbyllur me një deficit në të ardhura prej 19.7 miliardë lekë. Kjo shifër është diferenca me planin e rishikuar pasi po të krahasohet me atë që ishte prashikuar në fillim vit deficit është 36 miliardë lekë.
Sipas të dhënave të ministrisë së financave deficit në buxhet është shkaktuar vetëm në katër muajt e fundit të vitit, që përkon edhe me fillimin e fushatës anti informalitet, që ndërmori qeveria. Nga mungesa e të ardhurave 13.1 miliardë lekë janë shkaktuar nga mosrealizimet në tatime e dogana, ndërsa pjesa tjetër, 5.1 miliardë lekë nga të ardhurat jotatimore.
Të detajuara sipas taksave të ardhurat, ndonëse me rritje krahasuar me një vit më parë, kanë munguar kryesisht prej TVSH-së dhe akcizës. Performanca e dobët në TVSH, me 5.6 miliardë lekë më pak, sipas financave ka ardhur si rrjedhojë e rënies së importeve të cigareve, karburanteve dhe zhvendosjes së konsumit të produkteve ushqimore drejt prodhimit vendas. E njëjta gjë ka ndodhur edhe me akcizat të cilat kanë rënie me 4.6% në raport me 2014-n, duke pasur nivelin më të lartë të mosrealizimit të planit, me gati 5.9 miliardë lekë.
