Në kuadër të vizitës që po zhvillon në SHBA, Ministri për Evropën dhe Punët e Jashtme Ditmir Bushati mori pjesë në një aktivitet të organizuar nga Qendra për Analizat Politike Evropiane (CEPA) me temë “Këndvështrimi i Shqipërisë mbi Sigurinë Rajonale, Energjinë dhe Atlanticizmin në Ballkanin Perëndimor”.
Bushati paraqiti një panoramë të sfidave të sigurisë me të cilat po përballen sot shoqëritë tona dhe në veçanti Ballkani Perëndimor.
Duke u ndalur në rolin e Shqipërisë në rajon, Minsitri Bushati theksoi se Shqipëria ka një interes strategjik afatgjatë për të kontribuar në paqe dhe stabilitetin e rajonit dhe në këtë kontekst ka përdorur të gjitha platformat ndërkombëtare për të promovuar këtë pozicion.
Më konkretisht ai iu referua mbështetjes që i ka dhënë Shqipëria procesit të integrimit euroatlantik të vendeve aspirantë për anëtarësim në NATO nga Ballkani Perëndimor, duke nënvizuar se kjo përqasje është materializuar edhe në bashkëpunimin rajonal, ku rishtazi Shqipëria, Mali i Zi dhe Kroacia si tre vende tashmë aleate në NATO përgjatë Adriatikut po punojnë në një platformë trepalëshe për të ofruar kontribut të shtuar jo vetëm në platformat e sigurisë rajonale por edhe për të promovuar interkonektivitetin dhe zhvillimin shoqëror në Ballkanin Perëndimor.
http://www.balkanweb.com/site/ministri-bushati-nga-shba-te-merret-ne-konsiderate-rajoni-yne/
