Shqipëria, vendi ku Kryeministri, Presidenti e pjestarë të elitës politike kanë më shumë se një emër
Dy krerët më të lartë të shtetit, Presidenti dhe Kryeministri kanë ndryshuar njëri emrin tjetri mbiemrin. Nuk ka ndonjë arsyetim ligjor për këtë veprim që ka ndërmarrë secili prej tyre, por tashmë është fakt se përveç atyre zyrtarëve të lartë të shtetit shqiptar, si deputetë apo kryetarë bashkish, që kanë ndryshuar emrin për t’iu fshehur drejtësisë, në këtë listë janë edhe Presidenti e Kryeministri. Por, në këtë listë është edhe kryetarja e KQZ-së, Lefteri Luzi, e cila e kishte më herët emrin Lumturie Lleshi. Ish-rektori i Universitetit të Tiranës, Dhori Kule, ka deklaruar se më parë e kishte emrin Theodhor dhe mbiemrin Kuli. Të dhënat për krerët e lartë të institucioneve të pavarura, janë publikuar nga Ora News.
Në krye të listës politikanëve me më shumë se një emër, është kryebashkiaku socialist i Kurbinit, i cili mban katër emra. Në këtë listë janë dy kryebashkiakë të tjerë socialistë, i Kavajës dhe i Krujës, të cilët kanë mbajtur dy emra. Në këtë listë ka disa deputetë që kanë mbajtur më shumë se një emër. Tashmë nuk përbën lajm se pse një politikan ka më shumë se një emër apo mbiemër.
