Majlinda Bregu, në një deklaratë në rrjetin social “facebook”, deklaroi se i vetmi hall që e shqetëson është rikthimi i PD- së në pushtet me alternativë qeverisjeje serioze dhe jo hallet e çiftit Rama-Meta. Gjithashtu Bregu nënvizoi se, nëse do të ketë një qeveri të re Rama, nuk do të jetë pjesë e saj dhe as e ndonjë makinacioni MetaX.
Deklarata e plotë
Sqarim!
Dy fjalë atyre që lexojne portalet mediatike ku përflitem si pjesë e një skenari “shpëtimi” të qeverisë Rama1 përmes një qeverie Rama2 (përballë kërcënimit të supozuar nga një manovër MetaX në bashkëpunim të supozuar nuk e di se me kë, në partinë ku unë bëj pjesë!)…
Nuk e di a është një fantazi vere për arsye të vapes dhe thatësirës së lajmeve, apo është një diversion i sponsorizuar nga njëri prej dy partnereve të çiftit të palumtur, pra Rama ose Meta.
Ajo që di unë, është që s’jam marrë asnjë minutë me hallet e çiftit dhe të partive respektive. Nuk kam patur asnjë ditë pikën e dëshirës për të qarë hallet e palumturisë së lidhjes së tyre.
Nga ana tjetër kam qenë e qartë në çdo deklarim qysh prej “kurorëzimit ” të lidhjes së çiftit Rama-Meta, që janë për njëri-tjetrin, siç thotë populli në raste martësash jo fatlume: dy gjarpërinj në një jastëk!
Më kanë dalë dhe tepruar hallet partisë time që duhet të bindë njerëzit se nuk janë krejt pa shpresë.
Ndarja mes Konfliktualit dhe Konsensualit nuk mund të jetë për asnjë moment shpresa e PD për t’u rikthyer në qeveri.
Rikthimi i PD-së në pushtet me alternativë qeverisjeje serioze, është i vetmi hall që më shqetëson.
Sidoqoftë, për sa më takon është e sigurtë se:
Nëse do ketë një qeveri Rama2, unë NUK do të jem pjesë e saj dhe nëse do ketë një makinacion MetaX unë NUK do të bëhem pjesë e tij!
Kështu që kush ka fantazuar rreth meje në vorbullën e halleve të çiftit të palumtur, le të kërkojë gjetkë lajme verore.
Ndërsa në qoftë diversion, keqardhje për autorët dhe shpërndarësit e “informacionit”.
