Nga Mehmet Elezi
1.
COVID-19 na zuri tradhmend (në befasi). Pse?
Perëndimi ra viktimë e suksesit të vet. Mirëqenie, konsum, udhëtime. Teknologji, kulturë. Gati u harrua se njerëzimi është sa i fortë aq edhe i brishtë (vulnerabël). Një virus që s’e kap mikroskopi i zakonshëm, mund t’i bëjë gjëmën botës. Angela Merkel, për shembull, nuk harroi. Në shumë vende të kontinentit patën ulur ose përgjysmuar numrin e shtretërve në spitale. Gjermania jo. Domethënëse.
I bëhej trysni Shqipërisë për martesat e homoseksualëve. Gjithkush duhet të gëzojë të drejtat që i takojnë. Por, shoqëria ka përparësi. E njëjta trysni nuk iu bë Shqipërisë për të rritur buxhetin për shëndetësinë. Është më i ulëti në Europë, nën 2 përqind.
Kjo rritje do t’i shërbente jetës së krejt shqiptarëve, përfshi homoseksualët beqarë ose të martuar. Të drejtat e njeriut janë thelbësore në demokraci. E para në këto të drejta është siguria e jetës.
Po nëse do të shpërthente një luftë në përmasa të mëdha (never say never)?
2.
COVID-19 na zuri tradhmend. Pse?
Sa pak politikanë vizionarë, që mendojnë për të ardhmen! Sa shumë politikanë, që mendojnë për zgjedhjet e ardhshme!
3.
Do të ndryshojë bota mbas pandemisë?
Luftë asimetrike, vazhdon përballja.
Gjithsesi:
Nga pikëpamja e pasojave, bota do të jetë ndryshe.
Nga pikëpamja e nxjerrjes së mësimeve? Nuk e di. Përvoja dëshmon se njerëzimi është kujtesëshkurtë!
