Ish-Këshilltari për Siguri Kombëtare të Shtëpisë së Bardhë, John Bolton ka folur pa dorashka.
Ambasadori i karrierës ka vënë gishtin për të treguar ideatorët e vërtetë të idesë së shkëmbimit të territoreve mes Kosovës dhe Serbisë.
Ai ka përmendur me emër Hashim Thaçin dhe Aleksandar Vuçiçin si ideatorë të një projekti, të cilin ai nuk e ka kundërshtuar.
“Nuk ka qenë ideja ime shkëmbimi i tokave, janë liderët e Kosovës dhe Serbisë që e kanë kërkuar”-, ka thënë ai për emisionin “Fokus” të gazetarit Robert Papa.
Bolton, në intervistën ku ka folur edhe për librin e tij të ri kundër Trump, ka pranuar edhe se kjo ide kundërshtohej nga disa vende europiane, por ka theksuar që nëse dy vendet arrinin marrëveshjen, vështirë se dikush do të kishte forcë t’i dilte kundër.
“Një nga gjërat që do të diskutonim ishte këmbimi i tokave, por në Ballkan dhe Europë u prit me kundërshtime, pasi kishin frikë që një shkëmbim tokash atje mund të ndodhte edhe në Europë e gjetkë. Kjo ka ndodhur në histori, diçka me të cilën duhet të jetoni, ta pranoni. Nëse Kosova dhe Serbia do kishin arritur marrëveshjen, dhe do të ishte një pjesë e saj ndërrimi i tokave, dhe një pjesë e BE do ishte kundër dhe do e kundërshtonte vallë? Kjo nuk do ndodhte!”-, është shprehur ai.
/syri.net/
