Biznesmeni i naftës Frident Kuqi po hetohet nga Prokuroria e Tiranës për akuzat “Heqje të paligjshme të lirisë” dhe “keqtrajtim personi”.
Mësohet se Kuqi, pronar i kompanisë së naftës “Elda” është përfshirë në një ngjarje kriminale, pasi akuzohet se ka dhunuar dhe më pas ka marrë peng pronarin e pike karburanti në qytetin e Përmetit.
Biznesmeni akuzohet se ka marrë peng Ibrahimin dhe përmes presionit e ka çuar tek noteri, ku duhet të firmoste një dëshmi ku pranonte se i kishte një borxh prej 30 milionë lekësh të vjetra Kuqit. Kjo pasi ky i fundit i kërkonte 57-vjeçarit qiranë e pikës së karburantit në Përmet.
Policia në një njoftim të saj nuk ka dhënë detaje nga ngjarja, ndërsa shkruante se: “Më datë 03.10.2019, u referuan materialet në Prokurorinë pranë Gjykatës së Shkallës së Parë Tiranë dhe punohet për shoqërimin e shtetasit F.K., 59 vjeç, banues në Tiranë, pasi në bulevardin “Zhan D’ark”, ka kanosur e goditur me grusht, shtetasin G. I., 57 vjeç, banues në Përmet”.
