Vetëm industria ka 1 miliard dollarë detyrime
Viti 2016 e ka rritur edhe më tej nivelin e borxheve që kompanitë e mëdha të biznesit u kanë të tretëve. Kjo po e thellon më tej krizën në ekonomi ndërkohë që mungesa e likuiditetit po shtrihet si një merimangë në të gjithë sektorët e saj. Industria, e cila po vuan çmimet e ulëta të naftës dhe mineraleve në tregjet ndërkombëtare është sektori më i goditur. Detyrimet zinxhir në industri janë 1 miliard dollarë, ku kryesojnë kompanitë ARMO me 595 milionë dollarë dhe Kurum me 375 milionë dollarë. Ndërkohë qindra kompani të tjera të minerave dhe naftës janë duke punuar me humbje. Disa prej tyre kanë shpallur falimentin dhe të tjera janë duke kërkuar blerës. Vetëm ndaj kompanisë publike së nxjerrjes së naftës, Albpetrol është akumuluar një detyrim prej 60 milionë ero, nga mospërmbushja e detyrimeve kontraktore në zinxhirin e sektorit. Në sektorë të tjerë, kriza e borxheve është thelluar edhe nga mungesa e likuiditetit. Rënia e konsumit ka ulur të ardhurat për kompanitë, të cilat po hasin së fundi vështirësi në shlyerjen e faturave. Në ngërç janë edhe kompanitë e ndërtimit, prodhuesit e lëndëve të para si dhe vargu i gjatë i nënkontraktorëve të tyre.
Fenomeni ka përfshirë edhe qeverinë, e cila në fund të 2015 ka krijuar detyrime të reja ndaj kompanive private të kontraktuara për punë publike dhe rreth 10 milionë euro. Nga ana tjetër, lista e borxhlinjve të këqij në tatime vetëm për tre muajt e parë është shtuar me 1366 subjekte të reja.
