Kryedemokrati Lulzim Basha është takuar me përfaqësues të bizneseve në njësinë numër 3 në kryeqytet, ku këta të fundit kanë ngritur shqetësimin se mbyllja në fundjavë shkakton akoma më shumë humbje, pasi njerëzit gjatë javës janë në punë.
Basha akuzoi qeverinë për situatën e vështirë që po kalon biznesi duke theksuar se ajo nuk i ka dëgjuar sugjerimet e opozitës për t’i mbështetur ata financiarisht.
“Nuk kemi xhiro fare. Nuk e justifikon qiranë, nuk justifikon kredinë, nuk justifikon siguracionet. E keqja është se çdo klient që vjen nuk futet brenda se nuk ka lekë. E vetmja gjë që thonë është, nuk kemi lek. Mos të na e mbyllë të shtunën e të dielën. Njerëzit që janë në punë dalin për të blerë në fundjavë . Pandemia është ose gjatë gjithë kohës ose nuk është fare, kështu që është non sens. Ka rënë më shumë se gjysma e xhiros. Shitjet shkojnë më pak se 50 përqind. Asnjë xhiro. Ndërsa ishim në pandemi sigurimet shoqërore na i kërkonin. Taksat e bashkisë një më një. Jemi drejt falimentimit. Do të mbyllemi. Sa do rezistojmë? Një muaj dy muaj, po pastaj?! I kemi paguar të gjitha taksat, siguracionet, të gjitha. Çfarë mund të bëj me një kioskë kaq të vogël që e kaluan me TVSH?!”, thonë disa nga pronarët e bizneseve.
“Po të bëhej ajo që thamë ne, tu jepte lek njerëzve, të mbështeste me para gjatë kohës së pandemisë mos të binte konsumi, nuk do ishim në këtë situatë. Kjo është kriza ekonomike që thamë se do të vijë. Po nuk u ndihmuan njerëzit, po nuk u hap biznesi do vijë kriza ekonomike dhe ja erdhi. Kemi kaluar shumë të këqija, por ky e ka mendjen vetëm me zhvat, por gjërat do t’i ndryshojmë nuk do t’i lëmë kështu në mëshirë të fatit. Nëse bien të ardhurat tek konsumatori nuk ka me se të blejë. I thamë jepu lek njerëzve që të mos bjerë konsumi se po ra konsumi e ndjeni ju dhe gjithë zinxhirin e ekonomisë. Tani ka filluar krizë e thellë që do të shkojë thellë e më thellë. Këto janë shenjat e krizës”, tha Basha.
