“Rama të votojë Byronë e Hetimit, variantin që ajo të varet nga prokuroria ose një tjetër variant që të ngrihet një institucion kushtetues i pavarur”
Pak minuta pasi ka nisur seanca parlamentare, opozita është larguar duke braktisur sërish punimet e Kuvendit. Duke u larguar nga Kuvendi, Berisha tha se opozita nuk do ta pranojë një Parlament të tillë për sa kohë nuk zbatohet vendimet e Gjykatës Kushtetuese.
“Seanca po drejtohet nga madam lokomotiva”, ka thënë Berisha sapo në karrigen e drejtuesit të seancës është shfaqur Valentina Leskaj. Deputetja Leskaj është akuzuar nga opozita se ka përfituar fonde publike përmes kompanisë së birit të saj.
Pas Berishës në seancë foli, Taulant Balla, i cili akuzoi Berishën si kriminel, i cili do të përballet me ligjin sapo të miratohet reforma në drejtësi.
Ndësa kryetari i grupit parlamentar të PD, Edi Paloka tha se amendamenti që opozita ka paraqitur në Kuvend kërkon një gjë elementare, që zyrtarë, deputetë që janë kapur në flagrancë me krime të rënda ndaj njeriut deri në një vendim gjykate të mos vazhdojnë të kryejnë funksionet e tyre.
Duke folur para Kuvendit, Berisha i bëri thirrje Ramës të votojë Byronë e Hetimit, variantin që ajo të varet nga prokuroria ose një tjetër variant që të ngrihet një institucion kushtetues i pavarur me këtë mision të luftës kundër krimit dhe korrupsionit në nivelet e larta.
