Ish-kryeministri Sali Berisha ka sulmuar qeverinë për situatën në të cilën ndodhet vendi aktualisht në mes të një krize energjetike, rritje çmimesh dhe një epidemie të gripit të shpendëve.
Nga foltorja e Kuvendit, Berisha paralajmëroi protesta të mëdha, ndërsa akuzoi qeverinë se pasurohet gjatë natës në kurriz të mjerimit të shqiptarëve.
“Keni parë, ministra që vrapojnë prapa dyqaneve për t’u gënjyer ju se u qan zemra nga çmimet e rritura, spekulimet, të lidhura direkt me xhepin dhe kontot e tyre. Keni dëgjuar këtu ministra, kryeministrin, të rrahë gjoksin për suksesin në luftë kundër Covid-19, duke shpallur mbi 20 mijë të vdekur, numër kaq i lartë, janë njerëz ata s’janë numër. Energjia, lajmëtari i pari është vetë kreu i qeverisë. Nuk ndodh në botë që të bëhet zëdhënës i kompanive të naftës pa pasur aksione të veta në këto kompani. Ja dakord që tregu ka pësuar goditje nga lufta. Në Shqipëri nafta si në asnjë vend tjetër ka 4 taksa, e tarifa të larta… Ushqimet? Çdo shtet ka rezervën strategjike. Këtu janë të gjitha në oborrin e kryeministrit. Ku dyshohet për aksione, vepër kriminale, fatkeqësi. Kjo krizë nuk është afatshkurtër, nuk mund të jepni ju nga 300 lekë që nuk mjaftojnë as për rritjen e çmimit të bukës, pse nuk subvecionuat ju si Kosova, 420 dollarë për çdo hektarë të mbjellë. Ju jeni fajtorë pasi keni dorë, pasuroheni natën mbi mjerimin e shqiptarëve. Kjo pranverë duhet të jetë pranvera e protestave të mëdha”, tha Berisha.
Ish-kryeministri akuzoi ministrinë e Bujqësisë se ishte në dijeni të prezencës së gripit të shpendëve dhe se e mbajtën në fshehtësi lajmin për të ruajtur, sipas tij, reputacionin e qeveritarëve.
