Presidentja e Komisionit Evropian Ursula von der Leyen ka rritur presionin mbi kompaninë farmaceutike AstraZeneca, duke thënë se kompania duhet të ndalojë eksportet e planifikuara derisa të përmbushë detyrimet e saj ndaj Evropës.
“Bashkimi Evropian mund të ndalojë AstraZeneca të eksportojë vaksinën e saj COVID-19 nga blloku nëse kompania farmaceutike Britanike-Suedeze nuk përmbush detyrimet e saj të furnizimit. Ne kemi mundësinë të ndalojmë eksportet e planifikuara. Ky është mesazhi për AstraZeneca: Ju duhet të përmbushni kontratën me Evropën përpara se të filloni të dërgoni në vendet e tjera,” u tha von der Leyen gazetave nga Funke Media Group.
Ajo tha më tej se kompania kishte dorëzuar vetëm 30% të dozave të premtuara në tremujorin e parë të 2021. Von der Leyen gjithashtu theksoi se megjithëse kontrata me AstraZeneca kishte përcaktuar që BE do të merrte vaksina nga fabrikat në BE dhe Britani, nuk kishin marrë asnjë doza nga Britania.
Von der Leyen iu referua statistikave që tregojnë se të paktën 41 milion doza të vaksinës koronavirus ishin eksportuar nga BE në 33 vende, pavarësisht nga një mungesë në furnizimin me vaksina në bllok. Sipas komisionit, 9 milion doza kanë shkuar nga BE në Britani dhe një milion në SH.B.A.
“Nuk mund t’u justifikoj qytetarëve evropianë pse eksportojmë miliona doza vaksinash në vendet që prodhojnë vetë vaksina – dhe prej të cilëve asgjë nuk kthehet,” tha von der Leyen.
