“Shqipëria është “furnizuesi” më i madh i viktimave që bien pre e rrjeteve të trafikimit të qenieve njerëzore“, ka raportuar korrespondetja e BBC, ku paraqet situatën e rënduar të këtij problemi në vendin tonë.
Sipas një raportit të BBC, trafikimi i qenieve njerëzore drejt Mbretërisë së Bashkuar është në rritje. Shifrat më të fundit për 2015 sugjerojnë se 3.266 persona ishin viktima potenciale të trafikimit, një rritje 40% krahasuar me vitin e mëparshëm. Numri më i madh vijnë nga Shqipëria.
Që prej pas rënies së komunizmit në vitet ’90, Shqipëria njihet si një vend burim për njerëz që rrëmbehen, kontrabandohen dhe më pas shiten. “Trafikantët janë të mirë-organizuar“, shkruan korrespondentja dhe njihen për brutalitetin.
Viktimat shpesh manipulohen dhe rekrutohen përmes martesave të rreme apo mundësive për punësim, teksa trafikantët i premtojnë atyre se do t’u paguajnë kostot e jetesës, siç thotë edhe një raport i Kombeve të Bashkuara.
Rekordi i vendit në ndjekjet penale është i fragmentarizuar, por qeveria është vlerësuar se ka ndërmarrë hapa për të përmirësuar këto ndjekje.
Një raport i kohëve të fundit i Departamentit Amerikan të Shtetit sugjeroi rekomandime që duhen bërë për të hetuar, ndjekur dhe dënuar trafikantët dhe zyrtarët e përfshirë.
