Kreu i PD Lulzim Basha bëri edhe një herë thirrje që t’i jepet fund krizës politikë dhe të dialogohet në funksion të zgjidhjes.
Nga çadra e protestës, Basha tha se kjo zgjidhje nuk mund të jetë më shumë oksigjen për krimin.
“Edhe sot nga ky shesh, ftesa ime, ftesa jonë është t’i japim fund kësaj krize politike me dialog në funksion të zgjidhjes, që nuk mund të jetë më shumë oksigjen për krimin, më shumë kohë për drogën. Zgjidhja duhet të jetë përmes qeverisë teknike që të kryej zgjedhje të lira dhe të ndershme.
Nga ky shesh i themi dhe do t’i themi jo konfliktit, jo nxitjes së shqiptarëve kundër shqiptarëve. Asnjë njeri i vetëm nuk vlen sa bashkimi i shqiptarëve. Kjo ëndërr është tejet e madhe për të qëndruar në shpatullat e një njeriu të vetëm, por të vendoset në shpatullat e miliona shqiptarëve”, tha Basha.
Basha deklaroi se jemi në prag të muzgut të Republikës së Vjetër siç e cilëson ai, duke shtuar se përbetimi i ndërmarrë është përtej partive politike.
