Kreu i opozitës, Lulzim Basha ka deklaruar se të dhënat e raportuara për të infektuarit dhe viktimat janë të manipuluara.
Në një konferencë për mediat nga selia blu, Basha foli për situatën e pandemisë në vend, ku theksoi se qeveria nuk ka bërë asnjë reagim pas deklaratës së tij, për të cilën u referohet burimeve se spitalet Covid nuk kanë më kapacitete.
“Edi Rama është Robert Camcakëzi. Asnjë drejtor komunalje nuk shkon 10 herë në një kantier. Unë nuk do të lodhem që ditë për ditë ti kujtojmë detyrat dhe përgjegjësisë që ka.
Sot na shpallet plani i maskave. Nuk ka masa reale siç marrin vendet e tjera të rajonit për tu përballur. Edi Rama mosmarrjen e masave mundon ta fshehë pas maskave.
Arsyeja përse Edi Rama bën sikur nuk e ka dëgjuar planin tonë me 5 pika është rrjedhja e vazhdueshme e parave të buxhetit për skema korrupsioni. Edi Rama fryhet si gjel dhe kakaris si pulë.
Të dhënat e raportuara për të infektuarit dhe viktimat janë të manipuluara. Edhe drejtori i bashkisë së Tiranës që ndërroi jetë nuk është raportuar.
Këtu akoma mjeku i familjes është lënë jashtë kësaj beteje. Megjithëse kemi 6 muaj që bëjmë thirrje. Asnjë reagim nga qeveria për lajmin se spitalet COVID 1 dhe 2 janë mbushur plotësisht”, u shpreh Basha.
