Modeli i Koresë së Veriut po instalohet në Partinë Demokratike.
Ky është mendimi i Astrit Patozit, njëri nga kundërshtarët më të mëdhenj të procesit zgjedhor në Partinë Demokratike.
Patozi shprehet se farsa e Bashës po tejkalon çdo imagjinatë duke iu afruar gjithnjë e më shumë një modeli komunist ku sa më e thellë është humbja aq më e madhe është dashuria për liderin.
Përmes një postimi në Facebook Patozi paralajmëron Bashën të ketë kujdes, pasi sipas tij vafëria e shqiptarëve në vitet 70-80 rritej me sukseset e diktaturës, por më pas vjen fundi.
“Urime Lulzim! Nuk na ke zhgënjyer kurrë. Farsa jote realisht po kapërcen çdo imagjinatë.
Unë e parandjeva dhe e paralajmërova në drekë, por të jem i sinqertë, nuk e kisha menduar që do të mbërrinte deri këtu.
Ndaj jam i gatshëm të kërkoj ndjesë për fantazinë e pamjaftueshme.
Sipas komisionit të Jeminit kanë votuar rreth 20 mijë demokratë më shumë se 4 vjet më parë.
Konkluzioni: Sa më e thellë humbja, aq më e madhe dashuria për udhëheqësin e lavdishëm të partisë dhe popullit. Sepse është rasti tipik kur dhimbja kthehet në forcë.
Por për shembullin e Koresë së Veriut nuk kam gabuar. Ky është modeli që sot po instalohet në Partinë Demokratike.
Ndërkaq, më kujtohen vitet 70-80 kur, sa më shumë varfëroheshin shqiptarët, aq më shumë shtoheshin sukseset e diktaturës. Por të gjithë e mbajnë mend se çfarë ndodhi më pas, Lulzim…”, ka shkruar Patozi.
