Basha: Edi Rama po bllokon rrugën e Shqipërisë drejt Europës. E mirëpres Ramën në këtë çadër për të firmosur qeverinë teknike.
Kështu u shpreh kryetari i Partisë Demokratike Lulzim Basha nga çadra, ku prej 16 ditësh po mbahet protesta e opozitës. Gjatë një bashkëbisedimi me fermerët, teksa komentoi deklaratat e Ramës që ishte i gatshëm të dialogonte me PD-në edhe në çadër, Basha tha: “E mirëpres në këtë çadër për të firmosur kapitullimin pa kushte të krimit dhe drogës këtu në shesh, zbatimin e ligjit të dekriminalizijit dhe krijimin e kushteve për zgjedhje të lira dhe të ndershme.”
Më tej lideri i opozitës deklaroi: “… nga kjo çadër dhe ky shesh Shqipëria e vërtetë ta mirëpres si të penduar Edi Ramën, të mirëpresim dorëheqjen e tij këtu në këtë çadër.” Gjithashtu Basha akuzoi Kryeministrin se është ai personi që ka bllokuar rrugën e Shqipërisë drejt Europës.
“Rama po e bllokon hyrjen e Shqipërisë në Europë me drogën, krimin dhe moszbatimin e dekriminalizimit. Edi Rama solli dhe mban kriminelët në pushtet, mbushi Shqipërinë me drogë dhe nxori bandat nga burgu për të prishur zgjedhjet e lira dhe të ndershme. Zhbllokimi i rrugës europiane të Shqipërisë vjen nga lufta kundër drogës e parave të drogës, nga zbatimi i dekriminalizimit, nga zbatimi i reformës së vërtetë në drejtësi, nga largimi i Edi Ramës”, tha Basha.
