Kreu i Partisë Demokratike, Lulzim Basha, tha se populli është më i varfër se kurrë për shkak të rritjes së çmimeve që ka sjellë rënien e fuqisë blerëse me 21 për qind.
Basha ka komentuar sot nga çadra e protestës, situatën ekonomike në vend, ku sipas tij ka dështuar me mbledhjen e taksave i është rikthyer bizneseve me presione, gjoba dhe terror, për të mbushur xhepat e oligarkëve të Edi Ramës.
“Sa herë që dështojnë me mbledhjen e taksave, i kthehen presionit, terrorit ndaj biznesit. Mbajani shënim emrat dhe mbiemrat, “Republika e Re” do t’i vendosë para ligjit, dhe për çdo shkelje do marrë atë që meriton.
Askush nga punonjësit e shtetit të mos i bindet urdhrave të paligjshëm të eprorëve që duan të mbushin xhepat e tyre në këtë grahmë të fundit që iu ka mbetur. Mos iu bindni ose edhe ju do të përfundoni pas hekurave.
Nuk ka për të pasur asnjë falje, asnjë amnisti për ata që kanë marrë zvarrë dinjitetin e shqiptarëve në këto katër vite, do të përgjigjeni një për një përpara “Republikës së Re”. Dhe këtë e dini shumë mirë prandaj ju ka zënë tartakuti.
“Republika e Re” është dhe duhet të jetë mbi të gjitha republika e të vërtetaëe. Arben Ahmetaj ka premtuar rritje të rrogave deri në 10%. E vërtetë. Ka premtuar. Dhe ka dalë t’i bie daulleve.
A do rriten vërtetë? Pse jo?, Le ta shpjegojmë. Era e fundit që janë ritur rrogat ka qenë korriku i vitit 2013. Janë shtrenjtuar në këto vite, qumështi veza, karburanti me 28%, tarifat e arsimit të lartë me 30%. Nuk është dhënë shpërblimi i fundvitit që nga viti 2013.
Me rritjen 10% ai i ka borxh shqiptarëve 11% sepse fuqia blerëse ka rënë me 21%.“, tha Basha.
