Kreu i Partisë Demokratike Lulzim Basha gjatë një takimi me të rinjtë në Kavajë deklaroi partia që ai drejton nuk e ka votuar ligjin për arsimin e lartë dhe sipas tij kjo forcë politike e ka kundërshtuar atë ligj.
“Ne e kundërshtuam ligjin e arsimit në Parlament dhe po ju kujtoj se një nga premtimet e mija ka qenë anullimi i këtij ligji. Dhe me të ardhur në pushtet ne do ta anullojmë”.
Basha foli edhe për çmimin e lartë të karburanteve si edhe të energjisë elektrike ku tha se Rama i përdor për t’i ndarë me oligarkët.
“Për shkak të taksave mbyllen 50 biznese në ditë. 50 kryefamiljarë që dalin në mes të rrugës. Këto taksa nuk përdoren për përmirësimin e cilësisë së arsimit. Për të përmirësuar cilësinë e kopshteve, shkollave, apo për të siguruar një arsim cilësor universitar.
Këto taksa në vend që të shkojnë për të lehtësuar kushtet tuaja dhe për të mundësuar një arsim cilësor, këto taksa vidhen dhe shpërdorohen nga tre apo katër duar që fitojnë PPP-të e famshme. Tani na thotë që me 1 korrik nuk do të ketë më PPP, normalisht se deri më 1 korrik nuk do ketë më lekë. Shqipëria do të jetë vjedhur për 15 vitet e ardhshme”.
Sipas Bashës studentët që nuk kanë të ardhura dhe që vijnë nga familjet e varfëra do tu mundësohet arsim falas, transport falas dhe konvikte e libra falas.
Paratë që duhet ti jepën universitetit dhe konvikteve sipas kreut të PD-së, i marrin dhe i bëjnë të mira luksi për zyrat e tyre.
Ai i ftoi të gjithë të rinjtë e pranishëm por edhe shqiptarët në tërësi që të ngrihen për ti dhënë fund një shteti grabitqar, siç e cilësoi ai, dhe për të ndërtuar sipas tij, një shtet që nuk bën ligje për të vjedhur qytetarët, por për t’i shërbyer çdo qytetari.
