Kryetari i Partisë Demokratike Lulzim Basha i ka dërguar një letër Kryeministrit Edi Rama ku bën me dije se opozita ka pranuar pa kushte Paketën McAllister me ndryshimet përkatëse të bëra nga zyrtari amerikan.
Në letrën e tij, Basha i bën thirrje Ramës që ta pranojë sa më parë këtë paketë të propozuar nga zv/ndihmës sekretari amerikan i shtetit Hoyt Brian Yee.
Letra e plotë
Zoti Rama,
Në emër të opozitës ju informoj se prej ditës së djeshme në ora 12:00 opozita ka pranuar pa kushte propozimin e integruar të prezantuar si zgjidhje për krizën politike nga zëvëndës ndihmës sekretari i shtetit, Hoyt Yee.
Duke konfirmuar pranimin e plotë të propozimit të integruar, ju bëjmë thirrje që dhe ju të konfirmoni publikisht pranimin pa kushte të propozimit të SHBA, për t’i hapur rrugë zbatimit të kësaj pakete me qëllim garantimin e kushteve për një proces zgjedhor të lirë dhe të ndershëm për qytetarët shqiptarë.
Duke shprehur bindjen se propozimi i SHBA përbën rrugën e duhur për zgjidhjen e krizës, konfirmoj gatishmërinë e opozitës për implementimin e plotë të saj, pa asnjë vonesë.
