Kreu i Partisë Demokratike, Lulzim Basha është shprehur se vizita e tij në Gjermani dhe takimet me mikpritësit në Bundestag janë zhvilluar me qëllim diskutimin e krizës politike në vend.
Në një intervistë për Deutche Welle, Basha tha se ka gjetur mbështetje tek institucionet gjermane për këtë gjendje transformuese pasi sipas tij në Europë nuk shkohet me gënjeshtra dhe me shtet të kriminalizuar.
“Takimet që janë organizuar me mikpritësit e mi në Budestag, në kancelari dhe në Ministrinë e Jashtme kanë për qëllim diskutimin e krizës politike në Shqipëri dhe bashkëpunimin me partnerin tonë strategjik Gjermaninë për tejkalimin e krizës kushtetuese, institucionale dhe politike në Shqipëri. Në Europë nuk shkohet me gënjeshtra , nuk shkohet me shtet të kriminalizuar .
Largimi nga Parlamenti ndodhi pas shterimit të çdo mundësie për të zgjidhur në mënyrë institucionale këtë krizë të thellë legjitimiteti. Ju kujtoj që partnerët gjermanë në Bundestak dhe qeverinë gjermane i njohin këto probleme. Gjërat jo vetëm nuk kanë ndryshuar por janë përkeqësuar. Dalja e opozitës nga Parlamenti është një dalje pa kthim, kriza politike është reale por është një mundësi e madhe jo thjesht për të larguar një qeverisje të lidhur me krimin por për t’u dhënë shqiptarëve një sistem demokratik funksional që u shërben atyre dhe jo partive. Kam besim të madh që ky transformim që tashmë ka nisur, do të ketë mbështetje nga të gjithë shqiptarët e ndershëm. Në institucionet gjermane kemi gjetur mbështetje për këtë gjendje transformuese.”- u shpreh kryetari i Partisë Demokratike.
