Kryetari i Partisë Demokratike, Lulzim Basha ka deklaruar se në Shqipëri ka dy shoqëri civile, njëra që mbron kauzat e qytetarëve dhe tjetra që shpenzon paratë për të mbështetur kriminelët në pushtet.
Basha paralajmëroi se shumë shpejt të gjithë ata që kanë abuzuar me paratë publike do të japin llogari përpara ligjit, duke ju referuar dhjetëra shoqatave që kanë marrë përsipër peticionin për reformën në drejtësi.
“Në Shqipëri ka dy shoqëri civile, njëra është ajo e tendave të paguara me paratë e pista të krimit dhe korrupsionit, që kanë dalë në krah të krimit dhe korrupsionit. Në anën tjetër, kemi këta djem dhe vajza, që kanë fuqi të mbinatyrshme”, tha Basha.
Për çështjen e mbetjeve, Basha kërkoi transparencë të hetimeve nga ana e Prokurorisë për artikulimet në media se 1300 kontenierë me mbetje të rrezikshme kanë ardhur në Shqipëri.
“Nëse pra është sjellë si një bandit dhe një kriminel, e siguroj se bashkë me qytetarët do t’i sigurojmë të njëjtën përgjigje që i rezervohet një banditi. Unë i kërkoj sot Prokurorisë jo vetëm të hetojë me shpejtësi, por për të bërë transparencën e plotë dhe të gjithanshme të hetimit”, tha Basha
Në mbyllje të fjalimit të tij Basha premtoi se protesta nuk do të ndalet deri në krijimin e qeverisë teknike.
