Ish kreu demokrat, Lulzim Basha ka mbërritur në Kuvend, ku ka ndaluar të japë një deklaratë për gazetarët lidhur me zhvillimet më të fundit në PD dhe raportin me Sali Berishën.
Basha tha se nga takimet me terren ka parë që demokratët e bazës nuk e kanë ndjerë frymën e bashkimit, ndërsa shton se kush nuk është me Berishën, shpallet “kulak”, referuar këtu përplasjeve me Enkelejd Alibeajn.
“Unë vij nga takimet me demokratët në terren, të cilët nuk e ndjejnë frymën e bashkimit, ka një grup njerëzish që kanë vënë interesin e tyre personal dhe të Sali Berishës, përpara interesit të demokratëve. Ecin me parimin se kush nuk është me mua, shpallet kulak, e keni parë sulmin që i është bërë kryetarit në detyrë Enkelejd Alibeaj. Raporti i DASH konfirmon kauzat tona, përdorimi i shtetit për të tjetërsuar vullnetin e zgjedhësve, përdorimi i burimeve njerëzore për shantazhimin e votuesve. Në këtë moment PD dhe demokratët, duhet të mbrojnë interesat më të mira të shqiptarëve, duke insistuar që përgjegjësi kryesor Edi Rama të mbahet përgjegjës, edhe në kuptimin politik të fjalës, jo vetëm ligjor. PD e nisi këtë sezon parlamentar me disa nisma shumë të mira, ne duhet të jemi në ballë të aksionit për Vettingun e politikanëve, është pushtuar në mënyrë të paligjshme selia e PD-së, hapësira mediatike është e mbushur me 3 figurat e tranzicionit, askush nuk flet për rritjen e çmimeve”, tha Basha.
Kujtojmë se ish kreu i PD nuk ka qenë në asnjërën nga dy mbledhjet e fundit që janë zhvilluar me grupin parlamentar ku i pranishëm ka qenë Sali Berisha, dhe ku nuk kanë munguar debatet mes tij dhe Alibeajt.
