Një situatë e rrezikshme është krijuar në Zall Bastar, për shkak të rreshjeve te shiut. Mbi një mijë qytetarë kanë ngelur të izoluar pasi e vetmja urë qe ndodhet aty pritet të shkatërrohet nga momenti në moment dhe është pothuajse e mbuluar nga uji i vrullshëm i lumit.
Kjo është e vetmja urë, ku nxënësit kalojnë për të shkuar në shkollë dhe, siç tregojnë pamjet, është një rrezik i përditshëm në stinën e shirave.
Banorët shprehen se kanë shumë vite që protestojnë për një urë të re por akoma nuk kanë gjetur një zgjidhje nga qeveria dhe bashkia.
3 vjet më parë, kryetari i bashkisë Tiranë Erion Veliaj dhe administratori i zonës Xhemal Qefaliaj inspektuan punimet e nisura për një urë të re, por deri tani nuk është realizuar asnjë e tille.
Disa muaj më parë, kur protestuan për urën e munguar, banorët u thanë përfaqësuesve të PD, Gent Strazimiri dhe Abi Malltezi se fondet për urën e Zall Bastarit shkuan në Surrel, për kompaninë e ish kryetarit të komunës Dajt, Kujtim Qefaliaj, njëkohësisht edhe kryetar i njësisë administrative Dajt.
Zall Bastari është pjesë e Bashkisë së Tiranës, por premtimi i Erion Veliajt se “banorët e periferisë do të trajtohen njësoj si ata në ish Bllok”, rezulton një nga mashtrimet e tij të shumta.
