Banorët e “5 Majit” dhe të “Laprakës” në kryeqytet kanë zhvilluar një protestë para parlamentit, ku po mbahet një seancë plenare. Ata protestuan për të kundërshtuar shembjen e banesave të tyre, siç parashikojnë projektet qeveritare. Banorët i kanë bërë thirrje ministres Balluku që të dalë të mbajë përgjegjësi para tyre, ndërsa nuk kanë kursyer akuzat ndaj qeverisë. Madje një prej tyre tha se Balluku i shpenzon paratë e tyre për të rregulluar pamjen e saj.
“Balluku ka hallin e silikonit të vetë. I bën 50 mijë euro një operacion plastik. Ajo plastika që kanë në faqe u bëhet kancerogjen, se është bërë me lekët e fëmijëve tanë”, tha ai. Akuza u hodhën dhe ndaj kryebashkiakut të Tiranës Erion Veliaj. Banorët u shprehën se ai është hajdut, pasi shumë prej pronarëve iu ka marrë firmën me presione dhe të tjerët po i nxjerrë me dhunë nga shtëpitë, për të ndërtuar pallate.
