Bëhet me dije se i plagosuri nga të shtënat me armë ne Elbasan ditën e sotme dyshohet të jetë Talo Çela. Çela është person i shpallur në kërkim kombëtar dhe ndërkombëtar, pasi Gjykata për Krimet e Renda Tiranë i ka caktuar masën e sigurisë “Arrest në burg”, për veprat penale “Vrasja e punonjësit të policisë” kryer në bashkëpunim, mbetur në tentativë, “Vjedhja me armë e kryer në bashkëpunim”, në kuadër të grupit të strukturuar kriminal dhe “Vrasja me paramendim, kryer në bashkëpunim”.
Ai është dhe autori i dyshuar i ngjarjes së datës 9 prill 2019, ndodhur në pistën e aeroportit “Nënë Tereza”, në Rinas, Tiranë, ku persona të maskuar, nën kërcënimin e armëve të zjarrit, kanë arritur të vjedhin një sasi të konsiderueshme vlerash monetare të cilat po ngarkoheshin në avion dhe më pas gjatë shkëmbimit të zjarrit me Policinë, mbeti i vrarë njëri prej autorëve kryesorë të kësaj ngjarjeje.
Grupi hetimor po punon për zbardhjen e plotë të rrethanave të ngjarjes së sotme, ndërsa forcat RENEA po ‘krehin’ gjithë zonën. Fakti se në mjet nuk janë gjetur gjurmë apo njolla gjaku e bëjnë të vështirë identifikimin e personit, shtuar këtu dhe targat e makinës që rezultojnë të vjedhura.
